Sony Music Group-in Michael Jackson catalogue lei

Sony Music Group chuan Michael Jackson catalogue zahve chu USD mtd 600 in a lei. Michael Jackson musical asset hlut zawng hi a vaiin USD tld 1.2 vel nia chhut a ni.

Kum 2009-a kum 59 mi nia boral, Michael Jackson hi khawvela pop star hlawhtling ber zinga mi niin, a record hi khawvel pumah copy mtd 400 chuang a hralh nia chhut a ni. Kum 1982-a a tih chhuah,'Thriller' chu Guiness World Records chuan khawvela record hralh hnem ber niin a tarlang.

King of Pop hi streaming service-ah pawh a la lar chhunzawm reng a, Spotify-ah hian thla tinin a hla ngaithlatu hi mtd 40 vel zel awm ang an la ni. A hla zingah 'Billie Jean' leh 'Beat It' te chu Spotify bikah chauh pawh tluklehdingawn khat chuang play an ni ve ve tawh bawk. A chanchin hi film-a siam turin buaipui mek a ni bawk a, hei pawh hi a hit chhoh hle a rinawm.

Sony Music Group-in catalogue deal a siampuinaah hian Jackson Mijac publishing group hnuaia mi, Ray Charles, Elvis Presly leh Aretha Franklin-te hla pawh a tel a ni. Sony Music hian nikum khan Barry Weiss, Ron Perry leh Matt Pincu-te record catalogue a lo leisak tawh bawk.

Tun hma lam pawhin artist zingah an back catalogue hralh hi an lo awm tawh ṭhin a, Bruce Springsteen chuan USD mtd 500-a hralhin, Bob Dylan pawhin USD mtd 450 in a lo hralh tawh bawk. Canadian singer Justin Bieber chuan USD mtd 200-in Hipgnosis Songs Capital inremna a lo siampui tawh a, he company vek hian Shakira leh Justin Timberlake catalogue-te an lo leisak tawh bawk. Rock band Queen pawhin hralh tumin hma an la mek a ni.