Khiangte Construction Ṭhazual Lengzem : Pakhatnaah Puipuia Chhakchhuak 'Lunglen hnemtu'

Khiangte Construction Ṭhazual Lengzem chart tharah Mizo Idol 2015 intihsiakna aṭanga mipuite kan hriat lar, Thawhlehnaniropuia, Puipuia Chhakchhuak chuan ama hla ngei, 'Lunglen hnemtu' tih chu pakhatna a rawn nihpui.

Puipuia hi Idol intihsiak-naah hian kum naupangtea telin, a lo zaithiam bawk si a, lawm a hlawh hle. Intihsiak zawh hnuah thawm a nei chhunzawm reng a, a zaithiam zia kan hrechiang zel. Tun ṭuma chart-ah pakhatna a rawn nihpui, 'Lunglen hnemtu' hi ama phuah niin, nikum November thlaa a tihchhuah a ni. Music hi Thangbawiha kutchhuak a ni a, HC Records-a recording hi tiin, a music video hi Tea Chhakchhuak siam a ni. A zaitu a thiam a, a music video a hmuhnawm bawk a, beng leh mit a tlai e.

Pahnihnaah Lawmi Chhakchhuak 'Riahrun I rem dun ang' a rawn lang a, a aw no mawi dangdai tak mai hi ngaihthlak a nuam ṭhin. Zoram rimawi khawvela thawm lo nei lian tawh, Catherine Khiangte leh Vincy Chhangte pawh an rawn comeback e, an thawhdunna 'Chinky min kiss' chu pathumnaah an rawn lanpui nghal. Top 5-ah hian chart hmasa lama lang, Dorothy Grace & Cungkip leh Hlana & Mabiaki Pachuau pawh an la awm chhunzawm zel.

Lengzem Top 10-ah hian Drac Frost, Nicholas & Nunui pawh an la cham zel a, anni bakah Ngurthangvela'n a nupui fam ta puala a hla siam chu rawn lang tharin, Droc Frost ft Lunghlutei leh Bendict Fanai-te hla chu chart-ah hian a ṭum khatna atan an rawn lang bawk a ni.

ṬHAZUAL LENGZEM TOP 10 :
1 Puipuia Chhakchhuak - Lunglen hnemtu
2 Lawmi Chhakchhuak - Riahrun I rem dun ang
3 Catherine Khiangte & Vincy Chhangte - Chinky min kiss
4 Dorothy Grace & Cungkip - Nang leh kei
5 Hlana & Mabiaki Pachuau - Darmani zai
6 Drac Frost - Khawvel dang
7 Nicholas & Nunu-i - Elaine
8 Ngurthangvela - Ka phatsan lo'ng che darling
9 Drac Frost ft Lunghlutei - Nipui hmangaihna
10 Benedict Fanai - Ka di te kha