Super Bowl Halftime Show-ah Usher-a'n puitu a nei ṭha

Super Bowl LVIII Halftime Show-a headline, Usher chuan minute 13 a perform chhungin a sawi lawk angin special guest eng emaw zat a nei a, an zingah hian Alicia Keys, Ludacris, Lil Jon, H.E.R leh will.i.am te an tel.

Kansas City Chief leh San Francisco 49ers-te chuan Super Bowl LVIII hi khelin, Kanas City Chief an chak a ni. Inkhelh chawlh kar laka neih ṭhin, Halftime Show hi inkhel lam tuipui lo pawhin an ngaihven leh nghahhlelh em em a ni ṭhin.

Kuminah hian Usher hi headline niin, a perform-naah hian special guest a neih tur thu a lo sawi tawh a, mahse tute nge a sawm dawn tih erawh a sawi lang lo. A hun takah mipuite beisei phak bak star lar rual a rawn perform pui ta a ni.

Alicia nen hian kum 2004-a an lo tihchhuah dun tawh, 'My Boo' an rawn sa a, rapper Ludacris leh Lil Jon-te nen kum sawmhnih liam taa an larpui, 'Yeah' an perform ho leh bawk. 'Bad Girl' a sak chu H.E.R in a rawn pui a, will.i.am nen 'OMG' an sa bawk a, he hla hi 2010 khan a tichhuak a ni. Heng bakah minute 13 a perform chhungin Usher hian a hla 13 a sa kual hman a , heng zingah hian "Caught Up", "Love in this Club", "Confessions, Pt. II" leh "Burn" te pawh an tel.