Box Office: 'Argylle' in hma la hruai chhunzawm

North America chu kar liamta lam Super Bowl boruakin a chiah hneh a, box office lam thawm pawh a lian lo. 'Argylle' chuan pakhatna dinhmun a la hauh hram a, film thar ' "Lisa Frankenstein" chuan a rawn paihthla zo lo.

Matthey Vaughn-a spy action comedy hian a kar hnihnaah USD mtd 6.5 lakluh belhin, domestic-ah USD mtd 28.8 leh international-ah USD mtd 31.3 a lalut tawh.

Star lar rual - Bryce Dallas Howard, Henry Cavill, Sam Rockwell, Bryan Cranston, Dua Lipa, Ariana DeBose leh Samuel L. Jackson-te channa hian No 1 dinhmun hauh mah se, a sum lakluh hian beisei a la pha lo viau. Budget hi USD mtd 200-250 vel niin, budget zat hmuchhuak tur hian hmabak a la ko hle.

Film tlangzarh thar, horro comedy 'Lisa Frankenstein' chuan USD mtd 3.8 a lalut a, mahse he movie siamna atan hian USD mtd 13 vel chauh sen a ni thung. PG-13 love story-ah hian Kathryn Newton leh Cole Sprouse te an chang.

Top 5-ah hian 'The Beekeeper', 'The Chosen : S4 Episodes 1-3' leh 'Wonka' te an la awm chhunzawm.

Kar liam ta chhunga combined ticket sale hi USD mtd 40 vel niin, kum sawmthum chuang chhunga Super Bowl weekend-a ticket sale chhiat ber ṭum a ni.