Super Bowl 2024 entu an tam

Super Bowl 2024, Pathiannia neih tak chu US-ah mi maktaduai 123.4 velin an en a, kum 1969-a thlaa Apollo 11 ṭum lai (Moon landing) hnua US TV broadcast entu tam ber ṭum a ni.

Kumin Super Bowl game hi pop star, Taylor Swift leh a bialpa, Kansas City Chiefs tight end Travis Kelce te vangin ngaihven a hlawh zual nia ngaih a ni. Kansas City Chiefs hian San Francisco 49ers chu overtime-ah 25-22 a hnehin an champion nghe nghe.

Consumer research firm, Numerator chuan flash poll a buatsaih aṭangin, Super Bowl entu zinga 20% hian Taylor Swift leh Kelce inngaihzawn vangin Chiefs hi an ṭan niin a tarlang.

TV kaltlanga game entu zingah mi mtd. 123 chuang zinga mi mtd. 112 chuan CBS-ah an en a, a dangte hian Paramount+, Nickelodeon, Univision, CBS Sports leh NFL digital channel-ahte an en.