K-pop album America-a No 1 ni thei 5 awm

K-pop music-in khawvel a al hneh a, khawchhak lamah chauh ni lo, khawthlang ramahte pawh an thawm a lian zel a, music streaming platform hrang hrangah pawh record pawh an siam chho mawlh mawlh mai.

Kum 2023 khan US music chart-ah K-pop album, no. 1 ni thei panga an awm a, kum dang zawng aiin an tam.

American history-a K-pop act hlawhtling ber chu BTS an la ni a, kum 2018 daih tawhah khan no. 1 dinhmun hi an zu hauh tawh a, hemi hnuah pawh kum tin deuhthaw no. 1 an ni thei bawk. Mahse nikum khan BTS member pasarihte hi an ram danin a phut angin sipaiah an ṭang hlawm a, hei bakah solo project anga an kal chhoh avangin Billboard 200 no. 1-ah an lang ve ta lo.

2023-a K-pop album, no. 1-a lang thei hi group pali niin, Stray Kids chuan album pahnih an lanpui. Billboard 200-a K-pop album, no. 1 hauhtute chu StrayKids '5-Star' leh 'Rock-Star', TXT 'The Name Chapter : Temptation', NewJeans 'Get Up' leh Ateez 'The World EP.Fin : Will' te an ni. Stray Kids ni lo, a dang pathumte hi Billboard 200-a no. 1 an nih ṭum khatna vek an ni a, NewJeans hi Blackpink hnua girl group zingah top chart-ah lang thei hmasa ber an ni bawk. Billboard 200-ah hian no. 1 ni thei K-pop artist hi pasarih chauh an la awm.