India rama smartphone hmangtuten ni khatah phone khawih nan darkar 4.9 hmang

Boston Consulting Group (BCG) in zirchianna a neihah, India rama smartphone hmangte chuan chawhrualin ni khatah a cellphone chu vawi 80 vel an check ziah a, hei hi an harh hun chhung (awake time)-a 31% a tling pha. Ni khata phone khawihna atana an hun hman hi darkar 4.9 chuang a tling a ni.

"Reimagining Smartphone Experience: How 'Surfaces' can play a key role in making the phone smarter," tih paper an tihchhuahah, India rama smartphone hmangtue chuan an harh aṭang minute 15 chhungin an phone hi an khawih hman ziah a, phone khawihna atana an hun hman zat aṭanga a zahve chu content stream-na atan an hmang bawk. Kum 18-24 inkarten YoutTube-a short film leh Instagram Reels enna atan midangte aiin hun an hmang tam fal bawk.

Kum 2010-a zirchianna an neihah khan smartphone khawihna atana hun hman hi ni khatah darkar hnih vel a ni a, phone khawihtu zinga 100% chuan call leh text chu inbiakna atana an hman a ni. Mahse 2023-ah erawh inbiakpawhna atana call leh text hmangtu hi 20-25% vel chauh an ni tawh.

India ramah internet hmangtu hi desktop aiin an mobile phone kaltlanga hmang an tam zawk a, hei hi smartphone man tlawm zawkte a chhuah tak zel leh, data man a tlawm vang niin report chuan a tarlang.

Nikum khan India hian khawvelah mobile data hmang nasa ber dinhmun a lo hauh tawh. Nikum chhung khan mi pakhatin a smartphone hmanga thla khat chhunga a data hman hi GB 31 zet anga chhut a ni.