Khiangte Construction Ṭhazual : GOSPEL A chung berah Faktu 'Hruai zel ang che'

Khiangte Construction Ṭhazual Gospel chart tharah, mimal pawha zaithiam lar, zai lamah pawh sulhnu ṭha tak tak lo nei tawhte intel kawm, Faktu band chuan 'Hruai zel ang che' tih hmangin a chung ber dinhmun an hauh.

Faktu member-te hi RK Vanlalpeksanga (Mapeka), JH Lallungmuana (Jh-a), B. Lalbiakkima (Bka), Lalremsanga (Betea) leh Sangzuala Chhangte te an ni a, Zoram rimawi khawvela hriat hlawh tak, gospel artist ṭha ber zinga mi vek an ni. Mimal anga hun eng emaw chen thawm an neih loh hnuah, band angin an rawn inlan leh a, an thiamzia an rawn pholang nawn leh.

No. 1 an nihpui, 'Hruai zel ang che' tih hi band member-te phuah leh a thluk pawh an siam vek a ni a, nikum December 10 khan MDM YouTube channel-ah an dah chhuak a ni. Voice recording hi HS Studio-ah tiin, music hi an member JH Lallungmuana siam a ni a, guitar hi Eric Renza kuthnu a ni thung. Music video hi BS Pictures siam a ni.

Mizo zaithiam, aw pui tak nei Stacy VL Muanpuii chuan 'Ka chhungkua' chu pahnihnaah a rawn lanpui. He hla hi Tuikual Presbyterian Kohhran short film, 'Ka chhungkua' OST a ni a, a zai a ngaihnawm bakah a video pawh a hmuhnawm tel. Zaia rawngbawlna lama sawm hlawh tak, One in Christ chuan 'Nang hnaihin' tih hmangin pathumnaah an lang a, Mama Khiangte pawhin 'Kan ngai tawh lo'ng' chu hma rawn sawnpuiin palinaah a rawn chho a, Top 5 hi Lalfakzuali 'Zion zun leng' tih chuan a rawn khar.

Ṭhazual Top 10-ah hian The B4, Lalfakawmi (Mafaki) leh Esther Khiangte an la awm chhunzawm a, Zorinsanga Sailo leh Vanlalhriatdiki te chu chart-ah hian an rawn lang thar bawk.