LZ-a'n Ranchi-ah Cyclothon a tlanpui

Mission LIFE (Lifestyle for Environment) hnuaia All India Cycling tour, 'Ride to Clean Air' tih thupui hmanga thirsakawr hmanga India ram fan chhuah tumtu, Vanlallawmzuala Varte (LZa) chuan February 18 khan Ranchi, Jharkhand a thleng. LZa hi Jharkhand chief secretary, Lalbiaktluanga Khiangte, IAS chuan lo buaipuiin, VIP takin a lo dawngsawng. Ranchi-a Mizo awmte'n Chief Secertary Bungalow-ah an lo hmuak.

Nimin khan Jharkhand Pollution Control Board buatsaih, Cyclothon (Cycle Rally)-ah LZa hi hma hruaitu niin km 6 vel a tlanpui a, he rally-ah hian University zirlai 100 vel an tel. Rally zawh hian function neihnaah thu sawitir a ni a, painting competiton-ah judge-ah a ṭang nghal bawk. LZa hian January 25 khan Mizoram aṭangin Tripura a pan a, a tlan thlen tawh chin hi km 2,200 vel a ni tawh a, a cover tur hi km 15,000 vela thui niin, July/August-ah Mizoram a rawn thlen leh beisei a ni.