Box Office : Bob Marley biopic in pakhatna hauh

North American box office-ah fam ta, Bob Marley chanchin musical drama-a an siam, 'Bob Marley : One Love' chuan pakhatna a hauh.

Reinaldo Marcus Green direct, 'Bob Marley : One Love' hian sum an hmuh tura an beisei pawh a pha viau a, tlangzarh karah USD mtd 27.7 a la lut. Fans lamin review an pe ṭha a, CinemaScore-ah "A" an pe. Rotten Tomatoes-ah 43% fresh review hmuin, critics-te chuan zaithiam fam ta lema chang, Kingsley Ben-Adir performance chu an fak hle a, mahse a film erawh a 'safe' mah mah niin an ngai.

Bob Marley fapa, Ziggy Marley chuan box office-a 'Bob Marley: One Love' a chetṭhat chungchangah an chhungkua chu an lawm takzet a, an beisei phak bak a ni thu a sawi.

Film thar, 'Madame Web' erawh beisei angin a thawm a lian lo. Dakota Johnson channa, superhero film hian US mtd 15.2 la lutin pahnihnaah a awm a, international-a a sum hmuh hi USD mtd 25.7 vel a ni. Mahse a film siamna atan hian USD mtd 80 vel sen nia chhut a nih avangin, a sum lakluh hian beisei a phalo viau. CinemaScore-ah pawh "C" grade chauh a hmu pha.

Kar hmasa champion, 'Argylle' chu No 3-ah a tla thla a, USD mtd 4.7 a lak luh belh. "Migration' chu No 5 aṭangin No 4-ah a rawn chho thung. Faith-based series, "The Chosen: S4 Episodes 4-6" chu No 5-ah a awm.