Kesha-i'n music la tichhuak thei lo

Kesha chuan a producer hlui nena buaina an neih chu chinfel ni tawh mah se, music thar tichhuak turin a la zalen thei lo niin a sawi.

Kum 36 mi, 'Tik Tok' hitmaker Kesha hian a producer hlui, Dr Luke, a hming tak Lukasz Sebastian Gottwald chu kum 2005 khan party-naah damdawia a hrai ruih hnuah pawngsuala puhin a lakah thubuai a thehlut a, mahse Dr Luke hian puhna hi thu dik lo a ni tiin, Kesha lakah hian defamation case a file let ve bawk. Kum 10 dawn court lama an inkhin buai hnuah nikum June thla khan an inkar buaina hi an chingfel a, thuchhuah pawh a hran ve vein an siam zui bawk. An buaina an chinfel hnuah, Kesha chuan a hla thar turte a buaipui nghal a, mahse a la tichhuak thei lo a, tihchhuah theih hun erawh a la awm ngei ang, a ti.