Hotel California handwritten lyrics ruk bo thubuai ngaihtuah

American rock band, Eagles mega-hit, 'Hotel California' leh an hla hit dang, handwritten lyrics rua mi pathum puhna thubuai chu New York court-ah ngaihtuah a ni.

Band member Don Henley chuan Hotel California album-a an hlate, kutziak ngeia an ziahna hi ruk bo niin a sawi. Book dealer Glenn Horowitz, Rock & Roll Hall of Fame curator hlui Craig Inciardi leh memorabilia seller Edward Kosinski-te chu heng hla thu ziahna paper bote chu lo nei leh, phalna engmah an nei lo chunga hralh tumah an puh. Document rutu takah chuan puh an ni lo a, mahse, document erawh hi chu ruk bo a ni ngei tih an sawi. Mi pathumte hian thiam lohna an nei lo niin an sawi ve thung a, hla thu ziahna paper-te hi Eagles band tana lo thawk tawh kaltlanga an neih niin an sawi.