Beyonce-i'n country chart-ah record a siam

Beyonce Knowles chuan a single thar, 'Texas Hold 'Em' chu Billboard Hot Country Songs Chart-ah no. 1 a nihpui a, mihang hmeichhiate zinga country chart-ah no. 1 hauh thei hmasa ber niin record a siam nghal.

Queen Bey hian a hla dang '16 Carriages' chu Hot Country Songs Chart-ah hian no. 9-ah a lanpui. Chart-a a lanpui hla pahnihte hi February 11, Super Bowl laia a tihchhuahte an ni. Hemi ni vek hian 2022 album 'Renaissance' part two chu March 29-ah a chhuak dawn tih a puang bawk. R&B, pop, hip hop artist Queen Bey-in country hla lam a siam leh daih hi mi tam takin an sawisel a, sawiseltu zingah hian artist langsarte pawh an tel. Sawiseltu zinga mi, country singer John Schneider chuan Beyonce hi ui, hmun tina zung kual ang maiin a tehkhin. 'Park-a ui kal kual a, thingkung tin zun khum tum ang mai a ni," tiin a sawi. Azeelia Banks pawhin Beyonce chu a lar tawhna hmanga genre danga hming chher leh tuma beiah a puh. Hetih lai hian country hla a sa hi mi tam takin an thlawp a, K. Michelle leh Maren Morris pawh a faktu zingah hian an tel.

Oklahoma-a country radio station chuan Beyonce country single thar hi an play duh lo a, mahse, X lamah Queen Bey fan-te an campaign hnuah an play duh ve leh ta a ni.

Country music leh black artist-te chungchangah hian inhnialna a lo awm fo tawh a ni. Kum 2019 khan rapper Lil Nas X 'Old Town Road' chu Billboard Hot Country Songs-ah no. 1 a ni hnuah paih leh a ni a, chart siamtute chuan a country tawk lo tiin an sawi. Kum 2016 khan Beyonce country-inspired track, 'Daddy Lessons' chu Recording Academy country music committee chuan country Grammy-ah telh theih a ni lo tiin an lo hnawl tawh bawk.