Emilia Clarke-te nufain chawimawina dawng

Fantasy series, Game of Thrones star, Emilia Clarke leh a nu, Jenny Clarke-te chuan brain injury-te tana an hnathawh ṭhat avangin Britain lal fapa, Prince William hnen aṭangin chawimawina, Member of the Order of the British Empire (MBE) an dawng.

MBE hi Britain lalin midangte tana hnathawk ṭhate hnenah chawimawina a pek ṭhin a ni. Emilia Clarke hian kum 2011 leh 2013 khan brain haemorrghages a lo nei tawh a ni. A harsatna tawh aṭang hian brain injury neite chu damdawi-in an chhuahsan hnuah an inenkawl zuina tur ṭha tak a tam lo hle tih an hmuchhuah thu sawiin, hei vang hian a nu nen heng natna neita pual hian kum 2019 khan SameYou charity an din a ni. Charity din chu thil harsa leh hautak tak a ni tih sawiin, hemi rual an hnathawhte lo hriatpui a,chawimawina dawngtu zinga thlan an ni chuan an nufaah phurna leh chakna a pe tih a sawi.