DC FanDome a hnai ta Trailer an tichhuak

DC Comic fan-te tana ni hun ngahhlelhawm mega virtual DC convention, DC FanDome chu naktuk hian ṭan a ni dawn ta a, he convention hian ni hnih a awh dawn.

WarnerMedia hnuaia awm DC Entertainment chuan hemi chungchang hi tarlangin DC FanDome chu hlawm hnih lian tak takah an ṭhenhrangin DC Fan­Dome: Hall of Heroes leh DC FanDome: Explore the Mul­tiverse-ah an ṭhenhrang a ni.

DC FanDome hi ṭawng chi kuain an pe chhuak dawn a, dcfandome.com-ah a en theih dawn a, naupan lai aṭanga Batman, Superman leh Justice League comics vel lo ngaihven tawh ṭhin tan chuan hun nghahhlehawm tur tak a ni ngei ang.

DC FanDome: Hall of Heroes hi YouTube lamah pawh trailer an dah chhuak tawh a, ngaihhlut zawk leh chang­­tlung zawk tura ngaih a ni. Naktuk Inrinni zanah hian darkar riat chhung show hi an nei dawn a, keini ram hunah chuan zan dar 10:30 aṭangin an ṭan ang. 

Hall of Heroes-ah hi chuan DC Film lian, TV Series leh games chungchangte tihlan a ni dawn a, Wonder Woman 1984, The Batman, The Flash, The Suicide Squad, leh Zack Snyder-a Justice League chungchangte chiang zawka tarlan a ni dawn.

Trailer aṭanga a lan dan chuan Dwayne Johnson, Black Adam-te pawh chiang zawkin kan hmu thei tawh dawn a, The Rock-a hi a inlan dawn bawk a ni. The Batman director Matt Reeves leh James Gunn-te hnen aṭangain The Batman chungchang chiang zawkin a hriat theih a rinawm a, The Suicide Squad leh Wonder Woman 1984 star-te pawh an inlan dawn. Zack Snyder Justice League behind the scene-te pawh tihlan a nih hmel a, karleh lamah chuan DC FanDome vang hian entertainment media lam chuan DC kaihhnawih thu thar an nei nual ngei dawn niin a lang a, DC Fan-teah phurna nasa tak a thlen ngei bawk ang.

Explore the Multiverse hi chu darkar 24 chhung neih a ni dawn a, mahse September 12-ah daih a ni dawn thung. 

DC multiverse lamhawi a ni dawn a, zawhna leh chhanna hunte hawn a nih dawn bakah naupang lam tan KidsVerse an siam tel dawn bawk. DCEU chungchang vela zawhna nei chuan he hunah hian a zawh theih dawn a, naupang pual bik hi chu website hrang dckidsfandome.com-ah a en theih dawn a ni.