Vanglaini Bihchianna - Entrepreneur huang : ZO PUAKPHUR (Muṭia Agency)
Mizo ṭhalai, full time leh part time-a hnathawh duh tana muṭia lama kawng hawnsaktu, Zo Puakphur chu Vanglaini chuan a bihchiang a;
Zo Puakphur hi David Lalmuanpuia leh Zoremthanga Chalngeng-te din niin, an din chhan tihian an sawi, "Aizawlah hian hnam dang muṭiate'n zan tairek leh zingkar aṭanga thawh sen loh an neih laiin Mizo ṭhalaite chu thawh tur hre loin an awm fo mai. Speaker lar tak Fredericka'n, "Aizawl chu zanah chuan vairam a ni tawh mai' a tihte khan ngaihtuahna a tithui hle. Hnam dangin he eizawnna hi an thuhnuaiah an dah nasat tawh em avangin hnam dang muṭiate anga taima ve thei Mizo ṭhalai tam takte tan pawh kawng a awm ta meuh lo. Hei vang hian he eizawnna ṭha tak, hnam dang kuta dah pumhlum a ni deuh ta mai hi sukiang a, Mizo ṭhalaite'n muṭia lama eizawnna an neih theih nan leh, hnam humhim nan Zo Puakphur (Muṭia Agency) hi kan din ta a ni."
Aizawl khawpuiah ni tin motor lian 100 aia tam a rawn lut angin a chhut theih a, chung motor thil phurh hlang thla tur hian a lo berah motor pakhatah Rs 4,000 vel sen a ngai ṭhin. Heng aṭanga hnamdang muṭiate'n sum an lak luh tling khawm hi nikhatah Rs. nuai 4-te a tling thei a ni. Heti zat hnam dangin Aizawl khawpui sum rut a, an ram lama an thawn thlak hi Mizo ṭhalaite'n thawk se, Mizo kutah ngei sum hi lut se kan ram economy pawhin a kan phah awk theihna tur a ni. Hnam dang muṭiate anga taima Mizo ṭhalai tam tak an awm a, mahse, phungbawm emaw kaihruaitu tur emaw an haihchham a, he an harsatna sukiang tur hian Zo Puakphur hi a lo ding ta a ni.
David-a leh Zorema chuan Zo Puakphur an din chungchangah, hlawkna aiin Mizo ṭhalai tam tak, hnathawh tur hre lote'n eizawnna leh lei rem an rah theihna chu an rilruah a lian ber tih Vanglaini an hrilh. Duhsaka dawrtu an nei chho ve zel tih sawiin, bungraw neitu leh dawr neitute chu Zo Puakphur kher lo pawh, Mizo ngei chhawr tum turin an ngen bawk. 'Hnam chhan nana ni khat kawng zawh mai duh tawk loin, ni tin kan hnathawhnaah Mizo Hnam hnatlang hi i nei zel ang u," tiin an ngen.
Mizo ṭhalai, thawh hreh nei lo, zan rei leh zing hma takah pawh hna thawk peih tan Zo Puakphur phone no - 98620 49117 leh 98623 96537-ah ngaihven turin ṭhalaite an sawm. In ziak lut hi mi eng emaw zat an awm tawh a, an zingah hian zirlai pawh ṭhahnem tak an tel. Hna thawh tur duha inziak lut zingah hian hmeichhia pawh an awm nual tawh a ni.
Zo Puakphur hi Aizawl khawchhunga muṭia hna hrang hrang - balu, brick, cement leh dawr bungrua engpawh thiar ngai thawk turin koh theih reng an ni. In sa lai tan pawh in-sak bungrua an thiarsak thei bawk. Hei bakah hian pem bungrua insawn pawh an ti thei a, motor an neih vangin pem tur tan motor ngaihtuah buai a ngai lo. A in neitute buaipui ngai loin, an bungruate pack-sak vekin, an insawnna hmunah an rem felsak leh vek thei a ni. Muṭia hna bakah, nula in tifaitu, langa kal tur mamawh tan pawh biak pawh theih reng an ni bawk.
Zo Puakphur @zo_puakphur
Contact : 7085949852
Office - Lalchungnunga Building
JC Courier, Red Rose Near Maruti Nexa Showroom