Khawvel hnaih bertu Asteroid
National Aeronautics and Space Administration (NASA) chuan Thawhlehnia thuchhuah an siamah asteroid thlawk an hmuh tawh zinga khawvel hnaih bertur chuan khawvel a rawn pel tih sawiin, khawvel chung km 2,950 leka hlaah khawvel a rawn thlawh pel a ni, an ti.
Khawvel peltu asteroid hi a te hle a, SUV tiat lek niin a hmingah 2020 QG an vuah tih sawiin khawvelah rawn tla pawh ni se thil lian tham tihchhiat a nei tham dawn lo niin NASA Jet Propulsion Laboratory (JPL) chuan thuchhuah an siamah an tarlang.
2020 QG hi ft 10-20 inkar leka sei a ni a, India ram huna Pathianni zing dar 9:38 khan India tuipui chung zawnah khawvel a pel a ni. 12.3 km/s vela chakin a thlawk tih tarlangin California Institute of Technology-a Palomar Observatory telescope- Zwicky Transient Facility chuan khawvel bul a thlen hma darkar 6-ah khawvel a pel dawn tih hi an hmu a ni. US space agency chuan hetiang tiat vel asteroid hi chuan kumtinin khawvel hnaih takah khawvel an rawn pel fo ṭhin tih an tarlang bawk.