Ruatpuii hla thar 'A dawn phak lo'

Mizo zaithiam zinga hmabak nei eng ber pawl, India ram puma talent nei ṭha an koh khawm zingah pawh lo tel pha tawh ngat, Ruatpuii chuan nizan khan hla thar 'A dawn phak lo' a tichhuak.

Zonet buatsaih 'U Got Talent' winner hla thar hi lenglawng hla ṭha tak a ni  a, ruihhlo leh thildang min tichhe ṭhintu kalsan ngamna chu inchhir lohna zawk a nihzia tarlanna hla a ni a, ṭhalaite mamawh tak hla pawh a ni a, ṭhatlai hun hman fimkhur loh pawizia tarlanna hla a ni.

Ruatpuii chuan, “A dawn phak lo tih hi ka producer nen kan duh em em a, engkim mai hi phur takin kan ti thei a, a nuam khawp mai. He hla hi blue wave records kut chhuak a ni dawn a, Video hi tunlai boruak chho nen chuan siam a buaithlak a, kan tlin ang tawk a ṭhain kan bei ve a ni," tiin a hla thar tihchhuah chungchang hi a sawi.

A hla teaser pawh hi Blue Wave records instagram account lamah dah chhuah lawk a ni a, tunlai ṭhalai mil tak hla a niin, pop music lam hawi a ni. Music video a hmuhnawm  a, Alan Lalrinawma chu music video-a chereographer niin Mizo Dance Camp lama an lamthiam Bsi a inlan a, Ruatpuii nun pakhat zawk angin video-ah hian inlanin a lam a ni. An lam dan ringawt pawhin awmze thuk tak a nei  a nih hmel. 

Tunah hian Vanneihtluanga hla thar a buaipui chho mek bawk a, hei pawh hi kan thlirin kan ngaithla thuai thei turah ngai ang.