SAG Awards 2024: 'Oppenheimer' leh 'The Bear' an che ṭha

TV leh movie lama che ṭhate chawimawina, 30th Screen Actors Guild (SAG) Awards chu February 24 zan khan Los Angeles-a Shrine Auditorium & Expo Hall-ah sem a ni a, movie lamah 'Oppenheimer' leh TV series lamah 'The Bear' te che ṭha berin, award pathum ve ve an la.

Christopher Nolan-a epic biographical thriller, 'Oppenheimer' hian nomination pali hmuin, heng zinga pathumah winner a ni. Hetih lai hian nomination pali hmu ve tho, nikum chhunga sum la lut hnem ber, 'Barbie' erawh award dawng loin kutruakin an haw ve thung.

Awards sem zan hian Barbra Streisand hnenah SAG Life Achievement Award pek a ni a, he award hi Jennifer Aniston leh Bradley Cooper-te an hlan a ni.

SAG Awards hi tihdan phung pangngaiah chuan cable television-ah tihchhuah ṭhin a ni a, mahse, kuminah chuan a ṭum khatna atan Netflix-ah tihchhuah a ni a, host hran pawh an awm lo. Kum 20 chuang zet TNT leh TBS-ahte award sem hi tihchhuah ṭhin a ni a, mahse, viewer an tlem chhoh zel hnuah nikum kum tir lam khan Netflix hian SAG Awards tihchhuah theihna hi a nei ta a ni. Nikum khan an inpeihfel hman loh avangin Netflix YouTube channel-ah zawk pek a ni a, kuminah erawh SAG Awards hian subscriber mtd 260 chuang awmna Netflix-ah live-in tihchhuah a ni ta a ni.