Calvin Harris-a'n kum 50-ah chawlh a tum

Scottish DJ, record producer ni bawk Calvin Harris chuan kum 50 a tlin hunah DJ lam chu chawlhsan a tum tih a sawi. Harris hi January thla khan kum 40 a tling a ni.

UK radio station Capital Dance-in a kawmnaah, Calvin chuan kum 50 a tlin hunah chuan mipui hmaa perform tawh loin, music siam lamah insawrbing a tum tih a sawi. Spotlight lamah awm tawh loin, studio-a music siam chhoh chu a thlang zawk dawn tih sawiin, hla ṭha taka lo siam chu a talent zawk niin a sawi bawk. Hetih mek lai hian March 2-a The O2 arena, London-a Brit Awards neih turah Calvin hi Ellie Goulding nena perform turin a inbuatsaih mek a, a nghakhlel tawh hle tih a sawi. An pahnih hian kum 2012-ah 'I Need Your Love' leh 2014-ah 'Outside' hlaahte an lo thawk dun tawh bawk.