Article 370-in Rs. vbc 23 dawn la lut tawh

Political-action drama, Article 370 chu box office lamah a che ṭha zel a, kar liam ta Zirtawpnia tlangzarh kha niin, ni thum chhungin India ramah Rs. vbc. 23 a la lut tawh.

He filmah hian Yami Gautam, Priyamani, Arun Govi leh Kiran Karmakar te an chang a, B62 studios leh Jiostudios ṭangkawp kutchhuak niin director hi Aditya Jhambale a ni. A film laimu ber chu Jammu and Kashmir buaina, eirukna leh helpawl leh ram ṭhen darh tuma buaina chhuak chungchang a ni. Hei vang hian politics kaihhnawih lam pawh a lang tam. India prime minister Narendra Modi chuan India mipute chu he movie en tur hian a lo chah hial a, Kashmir buaina awm fo chungchangah information dik tak kan hmuh theih nana a puih theih a beisei thu a sawi. Article 370 hi Aizawlah en theihin a awm tawh bawk.

Article 370 hi India ram danpuiin Jammu and Kashmir hnena special status a pekna a ni a, mahse, BJP kaihhruai sorkar laipui chuan kum 2019, August 5 khan Article 370 hi a titawp a, Jammu and Kashmir state nihna pawh hlipin union territory pahnih - Jammu and Kahsmir leh Ladakh-ah a ṭhen zui a ni. Tun thlengin J&K political party hrang hrang chuan state-a dah let tur hian sorkar laipui an la nawr zui reng a ni.