Box Office: ' Bob Marley : One Love' a la dingchang

North America box office-ah Bob Marley biopic, 'Bob Marley : One Love' a la dingchang a, a kar hnihnaah no. 1 a la ni chhunzawm.

Film tlangzarh thar eng emaw zat an awm chungin, Jamaican Reggae icon movie luahlan zo an la awm lo. A kar hnihnaah hian theater 3,597-ah chhuah la niin, heng aṭanga a sum hmuh hi USD mtd 13.5 a tling. He movie siamna atan hian USD mtd 70 vel sen a ni a, khawvel puma a sum hmuh hi USD mtd 120 a tling tawh a, an beisei phak bakin a che ṭha a ni.

No. 2-ah film thar, "Demon Slayer: Kimetsu No Yaiba - To the Hashira Training" a rawn lang a, Japanese animated film series hi theatre 1,949-ah chauh tihchhuah a ni chungin tlangzarh karah USD mtd 11.7 a hmu chhuak thei.

Hilary Swank channa, 'Ordinary Angels' chu theater 3,020-ah chhuah niin, USD mtd 6.5 a la lut a, no. 3-ah a awm. Tlangzarh karah che ṭha hluai lo mah se, faith-based drama hi a daih rei ṭhin avangin sum pawh a la lak luh belh nual a rinawm. 'Madame Web' chu no. 4-a tla thlain, North America-ah USD mtd 6 a la lut a, no. 5-ah USD mtd 4 la luttu, 'Migration' a la lang bawk.