'Mo Sual' a en theih dawn ta

Tintin Entertainment leh Runmawi Apps ṭangkawpin an buatsaih, Mizo film thar 'Mo sual' tih chu naktuk, Zirtawpni zan dar 8 hian Vanapa hall-ah release a ni dawn ta.

'Mo sual' movie director hi Melody G Fanai niin, assistant director KC George a ni a, videographer hi BS Picture a ni. Story writer Romuanpuii Zadeng leh, screenplay director Nuna Hrahsel te an ni bawk.

He movie-in a entir tum ber chu sum ngainatnain chhungkua a tihkehdarh theih dan te, moin chhungkua a vuak darh theih ziate niin, Mizo society-a thil thleng ngei behchhanin, story pawh uluk taka duan a ni. A changtute hi Esther Sailo, Alice, Immanuel Khawlhring, Vee Elly, Solomon Fanai, Eddie Tochhawng, Lalrozama Ralte, F. Lalṭanpuii leh Jimmy Pachuau te an ni a, anni bakah support role pawimawh tak tak chang an awm nual bawk. An acting pawh a theuneu lo viau.

Mizo movie-a a vawi khatna ni turin he movie hi rualbanlo, a bikin bengngawng leh mitdel te pawhin an en ve theih tura chhawp chhuahsak a ni dawn bawk.

He movie hi apps lamah dah nghal a ni dawn lo a, March thla chhung chu show angin kalpui phawt a ni ang.