Marvel Cinematic Universe engtin zel nge?

Tunhnaiah Marvel Cinematic Univers-in thu thar neuh neuh an nei a, chung zingah chuan Spider-Man 3 film chungchang chu ngaihven hlawh ber pawl a ni. Entertainment media hrang hrangte chuan tunhnaiah MCU chanchin hi an ngaihven zual a, Black Pather engtin nge an kalpui zel dawn tihte, Avengers-a misual ber Thanos tihboralin a awm tawh si a, marvel Phase 4 engtin nge a awm dawn tih chu an chawtui ber pakhat chu a ni ngei e.

Shang-Chi and the Legend of the Ten Rings production an zo fel tawh a, an series thar tur 'Loki' trailer hmasa ber an tichhuak bawk. Loki chevel hi nakkum May aṭangin kan hmu thei dawn a, Tom Hiddleston bawk Loki lemah hian a la chang dawn.

Marvel Stuido hian The Falcon and The Winter Soldier trailer thar an drop bawk a, anni chevel hi nakkum March 19 aṭangin a en theih dawn thung a ni.

Marvel Studio chuan tunhnaia thuchhuah an siam zingah Wakanda khua chu tihboralin la awm dawn lo mah se an lalpa T'Challa erawh kan hmu tawh dawn lo a nih hmel.

Chief Creative Officer Kevin Feige chuan hemi chungchang hi rawn tichiangin Black Panther 2-ah T'Challa role kan hmu tawh dawn lo tih a sawi. Hei hi fam ta Chadwick Boseman zahna lantirna tura an thutlukna siam a nih thu sawiin, a sulhnu hnutchhiah chawimawina turin Wakanda khawvel chu la lan chhunzawm zel dawn mah se an lalpa erawh kan hmu tawh dawn lo a ni.

Marvel film-ah Batman Dark Knight trilogy star Christian Bale kan hmu dawn tih a chiang tawh a, Thor: Love and Thunder-ah misual Gorr the God Butcher lemah a chang dawn. Takiki Waititi film-ah hian Chris Hemsworth, Tessa Thompson leh Natalie Portman-te bulah a chetla ve dawn tih a chiang tawh a, a chevel a hmuhnawm leh hle ang.

Reed Richards, Sue Storm, Johnny Storm leh Ben Grimm-te film hi kan hmu fo tawh. Kum 1994, 2005 leh 2015-ahte khan heng mite chevel hi kan hmu tawh a, tunah erawh MCU-ah suan luh an ni tawh dawn a, Spider-Man Homecoming leh Far From Home director Jon Watts kaihhruaina hnuaiah production kalpui mek niin eng ang takin nge an rawn inlan dawn tih erawh a la chiang lo.

Feige chuan Ant-Man 3 chungchang pawh sawilang zeuhin Ant-Man and the 'Wasp: Quantumania' tih a ni dawn. Paul Rudd, Evangeline Lilly, Michael Douglas leh Michelle Pfeiffer-te an inlan leh dawn a, Cassie Lang lemah Kathryn Newton a chang dawn bawk. Variety chuan September thla khan Jonathan Majors chu Marvel-ah kan hmu dawn tih a lo tarlang tawh bawk a, hemi chungchang hi Feige chuan sawi chiangin time-traveling super-villain Kang the Conquerer lemah a chang dawn a ni, a ti.