Biker tana hman tur Samsung phone

Samsung chuan Galaxy J3 smartphone chu India-ah vawiin hian a tichhuak ṭan. He phone hi lirthei ke hnih nei khalh ṭhinte tana ruahman bik a ni a, Rs. 8,990 man tur a ni. Snapdeal aṭangin an zuar chhuak ṭan.

Galaxy J3 danglam bikna chu 'Bike Mode' tih a awm hi a ni. Bike emaw lirthei ke hnih nei chi khalh laia 'Bike Mode'-a dah chuan phone call rawn kal reng reng chu phone khan a lo chhansak ang a, a neitu a hman rih loh thu leh, a remchan veleha biak theih a nih tur thu a lo sawi ṭhin dawn a ni. Ṭawng chi 14 hmangin a lo chhanna hi dah a ni a, duh ber ṭawng kha a thlan theih dawn ang. Chuan chutianga lo chhang tura kan duh bik contact kha a thlan leh theih dawn a ni.

A spec lamah chuan a hmai inchi 5-a hlai a ni a, AMOLED display tur a ni a, LCD pangngai aiin power a heh lo fe. A thluak chak lam hi 1.5 GHz quad-core processor a ni ang a, a RAM hi 1.5 GB a ni. A hnung lamah camera ṭha tak, 8MP dah a ni a, a hma lam thung hi 5MP a ni. Internal storage a lian pangngai a, 16GB a ni a, MicroSD card, 128GB thleng a hman theih. Android 5.1 Lollipop a hmang a, 3G a hmang thei a, Wi-Fi leh connectivity dang a awm kim.