American Idol hnuhnung ber Trent Harmon. 'Pathian hi thil tak tak a ni'

American Idol season 15 zawh a ni ta a, Trent Harmon chu American Idol hnuhnung ber tura thlan chhuah a ni ta. American Idol-a thlan tawh tam takte ang bawkin Trent Harmon hian a hlawhtlinna dawhsan chu Pathian fakna hmun atan a hmang.

American Idol thlanna hnuhnung bera Grand Finale-ah hian Trent Harmon leh LaíPorsha Renae te an intihsiak a, Trent Harmon hnenah Idol nihna an hlan ta zawk a ni. Ningani zana result puan a nih chiah hian Harmon hian Pathian hnenah lawmthu a sawi nghal a, tunlaia mi tam takin Pathian leh sakhuana chu hetiang hmuna sawi chhuah tura an ngaih tawh lohna khawthlang ramah Harmon hian Pathian chu mihring ngaihtuahnaa din chhuah chawp mai a nih lohzia tarlangin 'Pathian hi thil tak tak a ni' a ti.

American Idol finalist pahnihte hi Mississippi chhuak ve ve an ni a, Harmon hi Amory khuaa mi a ni. Ṭawngṭai a ngaihthah ngai lo a, stage-a a inlan dawn apianga
ṭawngṭai ṭhin a ni. American Idol winner an puan dawn a, stage-a an chhuah hma chiahin a ṭawngṭai bawk. Winner puan hma, stage-a an chhuah dawn boruak hetiang hian a sawi: "A hma chiah khan tawi tein ka ṭawngṭai a, chumi hnuah chuan Porsha hnenah, 'Porsha, eng thil pawh thleng se, inkuah ang aw. Ka hming an lam chhuak emaw, nangma hming zawk a ni emaw, eng hming pawh lam se, kan inkuah nghal dawn nia aw,' ka ti a," tiin a sawi. Twitter-ah pawh Harmon 'Lalpa ka lawm e' tiin a hlawhtlinna chu Pathian pek leh
ṭanpui a nihzia a puang.

Idol finalist te pahnih hi Big Machine Records chuan contract a ziahpui nghal a, tun aṭanga rei vak loah an album tur pawh an buatsaih chhoh nghal a rinawm.

Harmon hi Mississippi state-a Amory khaw chhuak a ni a, a pa hi Randy Harmon niin a nu hi Cindy a ni a, farnu Randi Kahtryn Harmon a nei bawk. Kum 1990 October 8-a piang kha a ni. Mononeucleosis natna nei a ni a, hetiang natna nei Idol-a tel awm chhun a ni. The Voice-ah pawh a lo tel tawh a ni.

American Idol show hnuhnung ber a ni bawka Grand Finale zan hi a ropui a, American Idol lo ni tawhte hmel pawh kan hmu ṭha viau a, anni bakah milar tak tak an fuankhawm nasa; judge te pawh a langsar pawl ber an ni. Season 10-a kan hmuh Barry Manilow chu a rawn perform hmasa ber a, a hnuah Kellie Pickler, Taylor Hicks, Katharine McPhee, Constantine Maroulis leh midangten an rawn zawm. A hnuah Ryan Seacrest a rawn lang a, Season hmasa ber aṭanga lo tuipui tawh tana lung tileng turin, season hmasa bera co-host, a hnua kan hmuh zui tak em em loh Brian Dunkleman chuan a rawn zui chhuak a ni.

Grand Finale zanah hian finalist pahnih - Harmon leh La'Porsha te chuan Kelly Clarkson leh Justin Guarini te hla sak 'It Takes Two' ngei mai kha an rawn sa dun a, Clarkson te pahnih hian season hmasa ber finale-ah khan an sa a ni. Kara Diogaurdi te, Colton Dixon, Jordin Sparks, Kimberley Locke, Allison Iraheta, Pia Tiscano leh Carrie Underwood te an zai. Kelly Clarkson erawh chu nau nei mai thei a nih tawh avangin a rawn inlan thei lo thung.

Phillip Phillips, Lee Dewyze, David Cook, Nick Fradiani leh Kris Allen ten David Bowie pualin hun an rawn hmang a, Simon Cowell, Paula Abdul leh Randy Jackson te hmel pawh kan hmu leh a, Cowell chuan, "Ka lawm e, America, in rama min sawm avang hian. Fans te tel lo chuan show hi a awm thei lo ang," a ti.