Fashion Fiesta

Incheina a danglam tluk zetin kan duhdan leh ngainat zawng pawh a inthlak zung zung a. Nikum lawka kan ngainat kha kuminah chuan kan hne leh a, incheina pawhin mu leh mal a nei tawh lo. Hmana ṭhing kha tunah a tunlai leh a, nimin lawka tunlai kha vawiinah kan hne leh bawk si. Intlansiakna khawvel a ni miau a le, a tu a te pawh kan tlan dawr dawr mai chu a ni e. Incheinaah leh lek phei chuan a inlumlet zung zung a, kum hmasa lamah peter pan collar buaiin kan buai a, chutah box dress ho, kawr pian nei lo cut ngil pawp pawp ho, chumi hnuah kawr thindeng kan tih mai crop top, kawr chhing tii tei kan uar leh a, chutah desi kan ti, vai puan ziarang mawi tak tak kan chawhpawlh a, chutah net, taksa tlem lang buaiin kan buai leh a, vawiin thlengin kan uar chho zel a ni.

Cutting

Kawr cut lamah kan intlansiak a, kawr, a cut sawm theih patawp, rawng inmil lo inmil sia ṭhui kawp kan uar hle a, lace erawh a hlui thei tak tak lo a, a quality leh a ṭhan a danglam hret hret tih loh chu mi tam zawk ngainat a la ni ta fan a, amaherawhchu kumin kan chuankai meuh chuan a out ti tih ta mai a. Thawmhnaw ṭhui dan pawh danglam uchuak a awm tawh lo emaw ni chu aw, tih turin style kan hmuh leh hriat zawng zawng mi tih loh dan a nih dawn phawt chuan tlema dangdai duh tan phei chuan kan ha pawp pawp tawh mai a ni.

Tun hnaia Zoram min rawn run leh tan tu chu kum 1350 chho aṭanga khawvelin a lo hmelhriat ṭan, kawr ban danglam leh dangdai buaiin kan buai chho leh ta niin alang. Aizawl designers tam zawk dawra i kal chuan ṭhui sa hetiang lam hawi hi an lo kawl fur ang a. Design leh style inang lo tak tak, amaherawhchu inzul tak si i hmu nual ang; vawiinah chuan a taksa cut danglama inelna aiin a ban design-ah inelna a sang zawk. Kan hmelhriat chho mek bawk a, belchiang deuh teh ang.

1. Bell sleeve - A hming aṭang ringawt pawh hian a awm dan tur ang a hriat thiam theih mai awm e. Kawrban tlang arh hlei hluai sawina pakhat niin, dar aṭanga kiu thlenga tight in, a hmawr lamah a arh chhuak ṭhin. A hming put chhan bell lem te pawh a ang phian a, a ṭhenah chuan kiu chunga in cut-in banrek thleng a arh chhuak a, a tlangpuiin ban tlawn a ni ṭhin.

2. Bishop sleeve - A hming aṭang hian a un hmel viau mai a, a dar lam puk tawh lovin a hmawr tlang a puk hluai a, banrekah a inthlung khawm ṭhin. Kum zabi 15 na chhoah an uar hle a ni.

3. Angel sleeve - A dar aṭanga arh thla nghal hlawk, tla deuh delh delh sawi nan an hmang tlangpui.

4. Batwing sleeve - A hming put chhan ang deuhin bak thla parh ang deuh hian a zak cut kher loh, a taksa leh ban inzawm, banreka zuih ral ang chi ho sawina a ni. Secondhand thawmhnaw thing peih ho chuan kan hmu nual tawh ang. A nalh leh nalh loh ai mahin hak nuam tak anihna hian mite ngainat a hlawh phah fo.

5. Butterfly sleeve - Philippines ramah chuan an hmeichhiate hnam incheina nipahfawmin, kawr ban phe deuh hlep hlep thei, arh, che deuh delh delh thei sawina a ni a. Hmuh a nawm bakah a design hi a out tak tak ngai lo. Tleirawl tÍ aṭanga nutling thlengin an ngaina tlangpui.

6. Cold shoulder sleeve - A dar lehlam lehlam kua, taksa rawng lang thei tura an siam, mawi dangdai tak chu a ni phawt mai.

7. Juliet sleeve - 1960 chho a film lar leh lungkuai em em Romeo and Juiet film-a a changtunu hming changchawia phuah kawr, dar lama puk deuh det, banrek thlenga zuih thla sawina niin kum zabi sawmpa≠riatna chhoa an rawn uar chhuah a ni nghe nghe.

8. Kimono sleeve - Chinese ho hnam incheina ang deuh a siam, Ja≠panese kimono an tih mai ho hi a zak cut loh, hlai deuh hlep hlup, Japanese kimono te nen pawh a inzul hle a ni.