'Karate Kid' movie tharah Joshua Jackson

'Dawson's Creek' actor hlui, Joshua Jackson chu kum 10 dawn lemchan film thar a neih loh hnuah, 'Karate Kid' film thar siam turah a chang dawn.

Kum 45 mi, Joshua Jackson hian big screen lama a inlan hnuhnun ber chu kum 2015-a tihchhuah, 'Sky' kha a ni. A movie thar tur, 'Karate Kid' hi December 13-a tihchhuah tum a ni a, he film-ah hian Ralph Macchio, Jackie Chan te an inlan dawn a ni. 'American Born Chinese' star Ben Wang chuan lead role a chang ang. Director hi Jonathan Entwistle a ni dawn a, script writer Rob Lieber niin a plot erawh an la puangzar duh lo.