The Boss-in pakhatna a luah hram

Batman v Superman-in pakhatna a hauh a la rinawm viau nachungin The Boss film, a thar a rawn lang a, hei hian pakhatna a rawn hauh hram. Batman v Superman nena an inthlauhna pawh a tam lo khawp mai.

The Boss hian kar tawp chhung khan USD mtd 23.48 a hmu chhuak a, Batman v Superman hian USD mtd 23.44 a hmu chhuak a, an inthlau hle. The Boss hi Michelle Darnell chanchin a ni a, industry lian tak a nei a, mahse thil dik loa a inhnamhnawih avangin man a ni. Jail-ah khung a ni a, jail aṭanga a rawn chhuah chuan a sumdawnna chu tharthawh leh a, a hmaa a hlawhtlinna ang neih let tumin, eng pawh huamin a rawn thawk chhuak a, mahse a thil tihsual avangin miten an la ngaidam lo; chutiang harsatna kara a beih chhoh dan chanchin a ni.

He film-a a main character hi hmeichhia a nih avang a niang, entu zingah pawh hmeichhia an tam ber. Entu zinga zaa 67 zet chu hmeichhia an ni a, an zinga a tam zawk hret hi kum 35 hnuai lam an ni.

Batman v Superman chuan hapta thumnaah pawh sum a la lalut hnem hle a, USD mtd 23.44 lai a la lalut a, hengte nen hian N. America bik aṭanga a sum hmuh tawh zawng zawng chu USD mtd 296.7 lai a tling tawh.

Box office movie

"The Boss" - $mtd23.48

"Batman v Superman: Dawn of Justice" - $mtd23.44

"Zootopia" - $mtd14.4

"My Big Fat Greek Wedding 2" - $mtd6.4

"Hardcore Henry" - $mtd5.1

"Miracles from Heaven" - $mtd4.8

"God's Not Dead 2" - $mtd4.3

"The Divergent Series: Allegiant" - $mtd3.6

"10 Cloverfield Lane" - $mtd3

"Eye in the Sky" - $mtd2.8