Billboard 200 : TWICE-in a ṭum khatna atan No. 1 dinhmun luah

Billboard 200 album chart tharah, South Korean girl group, TWICE chuan a vawi khatna atan an album,'With YOU-th' tih hmangin no. 1 dinhmun an hauh.

Member pakua- Nayeon, Jeongyeon, Momo, Sana, Jihyo, Mina, Dahyun, Chaeyoung leh Tzuyu awmna, TWICE hian February 23 khan an album hi an tlangzarh a, tlangzarh karah hian US-ah equivalent album unit 95,000 neiin, he album-a hla parukte hian on-demand official stream mtd 6.33 leh album sales 90,000 an nei bawk.

No. 2-ah chart luahlumtu, Morgan Wallen 'One Thing at a Time' a rawn chho leh a, nikum March thla daih tawha tlangzarh he album hian kar liam ta chhung khan equivalent album unit 67,000 a la nei thei a ni. Chart hmasa lama no. 1 hauhtu, Kanye West leh Ty Doll $Ign's "Vultures 1" chu no. 3-ah tla thlain, equivalent album unit 64,000 a nei. Noah Kahan 'Stick Season' chu no. 4 a la ni chhunzawm zel a, SZA 'SOS' pawhin a dinhmun ngai la luahin, Top 5 a rawn khar.

Hun eng emaw chen no .1 dinhmun pawh lo hauh tawh, Drake 'For All the Dogs' chu no. 6-ah awmin, Taylor Swift chuan a album pahnih,'1989 (Taylor's Version)' leh 'Lover' chu Top 10-ah a lanpui a, South Korean girl group dang, LE SSERAFIM leh 21 Savage 'American Dream' pawh an lang bawk a ni.