Facebook leh Instagram service buai vangin Mark Zuckerberg-a'n USD tld 3 dawn a hloh

Meta CEO Mark Zuckerberg chuan Thawhlehni zana khawvel puma Facebook leh Instagram service a buai avang khan USD tld 3 dawn a hloh hman.

Meta hnuaia flagship platform pahnih service a buai chhung hian Zuckerberg chuan USD tld 176 a neih aṭangin USD tld 2.79 a chan hman a, mahse, heti chung hian nimina Bloomberg Billionaire Index-ah chuan khawvela mi hausa palina erawh a la ni zui tho a ni. Darkar khat chuang khawvel puma Facebook leh Instagram a buai avang khan Meta share chu 1.6%-in a tlahniam hman a ni.

Facebook leh Instagram service buai chhung hian social media platform dang, X lamah post a tam hman hle a, X neitu Elon Musk chuan Meta lo tihelna remchangah hmang zuiin, "He ka post hi in chhiar theih chuan, kan service a chhe ve lo tihna a ni," tiin a X-ah a lo post hman.

Kum 2021 khan Meta hnuaia platform hrang hrang - Facebook, Instagram leh WhatsApp service chu darkar sarih dawn a lo buai tawh bawk. Thawhlehni zanah erawh hi chuan WhatsApp lam a buai tel lo thung a, Facebook leh Instagram buaina pawh hi darkar hnih chhungin an siam ṭha leh hman a ni.