2023 chhunga Hollywood actor sum la lut tam ber Adam Sandler

Forbes magazine chuan kum 2023 chhung Hollywood actor zinga sum la lut tamte list tichhuakin, an zingah Adam Sandler chu sum la lut tam ber a ni.

Nikum July thla khan film pahnih, 'Oppenheimer' leh 'Barbie' te chu ni in angah tlangzarh niin, an thawm pawh a ring hle. Film pahnihte sum lak luh hi USD tld 2.5 dawn a tling pha a ni. Kum 2023 kha film lamah chuan Barbenheimer year tia ngaih pawh a ni hial a, mahse, heti chung hian heng film pahniha changtute hian sum lak luh tam lamah Adam Sandler hi an pha ta chuang lo a ni.

'Billy Madison','Happy Gilmore' leh 'The Wedding Singer' - Heng film aṭang hian Adam Sandler hian nikum chhung khan USD mtd 97 vel a la lut pha nia ngaih a ni a, a movie 'Murder Mystery' series second installment chu Netflix-ah tihchhuakin, view hi darkar mtd 173 chuang a nei. Kum 57 mi, Sandler hian kum 2014 khan film pali atan Netflix hi USD mtd 250-in inremna a lo siampui tawh a, hemi hnu hian thawh dunna tur inremna dang pawh eng emaw zat a ziahpui leh bawk.

Kum 2023 chhunga Hollywood actor, sum la lut tam zual 10-te lak luh belh khawm hi USD mtd 449 a tling pha a, hei hi movie bik chauh niin TV lam a tel lo. 'Barbie' star Margot Robbie chu sum la lut tam pahnihna niin, Top 10-a lang pha zinga naupang ber a nih bakah, hmeichhe lang pahnih zingah a tel bawk. List-a lang zingah hian Denzel Washington chu mi hang awm chhun a ni a, British actor zingah Jason Statham chauh a lang pha bawk a ni.