Taylor Swift inremna an siampui chungchang Singapore Prime Minister-in a sawi fiah

Singapore prime minister Lee Hsien Loong chuan Singapore-a Eras Tour nei tura Taylor Swift inremna an siampui chungchang a sawi fiah.

Singapore hian Eras Tour hi Southeast Asia ramah Singapore-ah chauh nei turin Taylor Swift hi inremna siampuiin dollar maktaduai eng emaw zat an pe nia sawi ni a, hei hi a ṭhenawm ramte'n an sawisel nasa hle. PM Lee chuan, "Kan agency-te chuan Singapore-a rawn perform tur leh, Southeast Asia ram zingah Singapore-ah chauh tour nei tur hian inremna an lo siampui a ni. Hei hi kan ṭhenawm ramte laka hawihhawm lohna pawh niin ka hre lo," a ti. Inremna siam lo pawh ni se, pop singer hi Southeast Asia ram dangah a perform kher ang em tih engmah a chiang lo a, hei chu ama thutlukna a ni, tiin a sawi zui.

Singapore ram ṭhenawmte chuan Taylor Swift inremna an lo siampui hi an sawisel nasa hle a, Thailand prime minister Srettha Thavisin chuan hetianga an remruatna hi lo hria ni se chuan anni pawhin inremna hi siampui an tum ngei tur thu a sawi a, Phillipine legislator Joey Salceda pawhin Singapore thiltih dan chu ṭhenawm ram ṭha tak tih dan tur a ni lo, a ti bawk.

Taylor Swift hian March 2-4 khan Singapore-ah concert vawi thum nei tawhin, March 7-9 hian vawi thum dang a nei leh dawn bawk a ni.