Miss World 2024-ah Krystyna Pyszkova thlan a ni

17st Miss World pageant grand finale chu March 9 zan khan BKC, Mumbai-ah neih a ni a, Czech Republic aiawhtu, kum 25 mi Krystyna Pyszkova chu Miss World 2024 atan thlan a ni. Czech Republic ram aṭanga Miss World ni thei pahnihna a ni.

First runner-up-ah Miss Lebanon Yasmina Zaytoun thlan a ni bawk. Top 4 finalist-ah hian Miss Trinidad and Tobago, Miss Botswana, Miss Czech Republic, leh Miss Lebanon-te an lang.

Miss World 2024 Krystyna Pyszkova hi model niin, English, Polish, Slovak leh German ṭawngte nal takin a ṭawng thei. Krystyna Pyszko Foundation dintu a ni bawk a, Tanzania ramah naupang harsa zawkte tan English school pawh a hawng a ni. Tunah hian law leh business adminstration-ah dual degree a zir mek.

Miss World pageant hi India-in kum 28 hnua a thlen leh vawi khatna a ni a, kuminah hian ram 112 aiawh nula hmelṭhate an tel. Grand finale hi Jio World Convention Centre-ah neih a ni a, finale-ah hian judge 12 an awm a ni. India aiawhtu, Miss India World, Sini Shetty chuan top 4 a thleng zo ta lo. India hian Miss World crown ṭum ruk lo la tawhin, India aiawha he title lo hlawh chhuak tawhte chu - Reita Faria (1966), Aishwarya Rai Bachchan (1994), Diana Hayden (1997), Yukta Mookhey (1999), Priyanka Chopra Jonas (2000), leh Manushi Chillar (2017) te an ni.

Miss World Organisation chairwoman, Julia Morley CBE chuan grand finale zanah hian Nita Ambani hnenah Reliance Foundation kaltlanga a hnathawh ṭhat vangin Beauty With A Purpose Humanitarian Award a hlan bawk a ni.