MDM-in zaithiamte hnenah royalty sem chhuak

Music Domain Mizoram (MDM) chuan an YouTube channel aṭanga an sum hmuh, Rs. nuai 2 chuang chu an member zaithiam 30 chuang hnenah a sem chhuak. Zaithiam zingah Asanga ft. Ruatpuii chuan dawng hnem berin, Rs. 80,000 chuang an dawng a ni.

MDM hian a din tirh, 2011 aṭang khan Music Video Library a siam a, Mizoram leh ram pawnah te subscription fee lain a pe chhuak ṭhin. Library subscription fee aṭanga sum lutte chu zaithiam (artist) te hnenah thla tin a sem chhuak ṭhin a ni. Mahse TV lam digitalised a nih a, Set Top Box hman a nih aṭangin Library subscribers an tlahniam a, library kal tlanga royalty a sem ṭhin pawh a tlahniam ta deuh a, tun thlenga MDM-in library aṭanga royalty a sem chhuah hi Rs. nuai 60 a chuang tawh.

MDM YouTube Channel siam a ni leh a, Mizoram YouTube channel zinga subscriber ngah ber pawl niin; tunah hian subscriber 713K chuang a nei mek. YouTube aṭanga sum an hmuh hi video neitu/producer hnenah quarterly-a pek ṭhin a ni. YouTube royalty sem tawh hi June 2023 thleng khan Rs. 15,79,029.00 a ni a, sem hnuhnun ber leh sem mek hi Rs. 2,31,139.00 a ni.

Tunah hian Library Subscription fee leh YouTube Royalty bakah MDM chuan Thulkhung App a nei a, hei hi Video leh Audio Streaming App niin Mizoram E-Governance Society (Msegs) nena duan leh buatsaih a ni. audio, music video leh film-te stream ṭan niin dawr theih reng an ni. MDM hian Chanmari, Ramhlun Road, IDBI Bank hnuaiah office neiin sorkar working days-ah dawr theih reng a ni.