Nikum chhunga album hralh hnem lawt lak Adele 25
Kum 2015 chhung khan album ṭhahnem tak tihchhuah a ni a, zaithiam lar dang tam tak an awm a, mahse Adele album '25' chu an hralh hnem lawt lak. Album hralh hnem dang pangate album hralh zawng zawng belhkhawm aiin Adele album hralh hi a tam zawk.
Ed Sheeran, Taylor Swift, Justin Bieber leh Sam Smith te pawh an awm a, heng mitena album an tihchhuah hi hralh hnem tak an ni a, record eng eng emaw an siam fo. Mahse Adele hi chu ropui tak a ni, khing mite album hralh zawng zawng belhkhawm aiin a album 25 a hralh hnem zawk.
Kum li chhung zet album nei loa a awm hnuah Tottenham khuaa piang Adele hian 25 album a rawn tichhuak a, a ropui cher cher hle. A album hma hruai, 'Hello' ringawt pawh ni hnih lek chhungin YouTube-ah entu maktaduai 50 an tling hman der. Album a rawn tichhuak a, a tihchhuah aṭanga chawlhkar khat lek chhungin US-ah copy maktaduai 3.38 zet a hralh thei nghal a, an beisei aia tam fe an hralh. Nikum chhung khan he album hi copy maktaduai 17.4 zet a hralh hman a ni.
Adele dawta hralh hnem chu Ed Sheeran-a album X kha a ni a, pathumnaah Taylor Swift album 1989 niin, heng album pahnih hi nikum chhung khan khawvel pumah copy maktaduai 3.5 ve ve an hralh; heng album-te hi kum 2014-a tihchhuah kha a ni. Palinaah Justin Bieber-a album 'Purpose' kha a lang pha a, nikum chhung khan copy maktaduai 3.1 zet a hralh a, pangana chu Sam Smith album 'In the Lonely Hour' kha niin, maktaduai 2.6 a hralh.