Khiangte Construction Ṭhazual Lengzem : JH Peka 'Ka thlah phal lo'ng che' a rawn lang e

Khiangte Construction Ṭhazual Lengzem chart tharah, JH Peka chuan, a hla 'Ka thlah phal lo'ng che' tih chu a chung berah a rawn lanpui.

'Ka thlah phal lo'ng che' official music video hi nikum November 27-a a tihchhuah a ni a, a video hi aflimby_kim leh Sammie te kutchhuak niin, a music video a class a, a zaitu a thiam bawk nen, thlir leh ngaihthlak manhla tak a ni. Chart hmasa lamah pawh lo lang tawhin, hma a rawn sawn zel a, no. 1 dinhmun a rawn hauh thei ta a ni.

Asanga Project ft. Fawni Ralte 'Kan nunhlui' chu chart hmasaa 5-na aṭangin 2-naah a rawn invawrh chho a, Lalṭanpuia Sailung chuan 'Ka ṭahpui ta' tih chu no. 3-ah a rawn chhohpui bawk. No. 4 leh no. 5-ah mi thar, Omomi Khiangte 'Ka suihlung a leng lo'ng e' leh F. Zomuanpuia 'Bal an chhum' tih an rawn lang.

Ṭhazual Lengzem Top 10-ah hian Drac frost ft. Lunghlute leh Nicholas & Nunui-te an la lang chhunzawm a, hetih lai hian lang thar pathum awmin, Grace 10:45, Ruth Roluahpuii leh Mabiaki Pachuau-te chuan chart an rawn luahlum ve ta bawk a ni.