Forbes: Actress hlawh hnem ber Sofia Vergara

Forbes chuan kum 2020-a hmeichhe film chan thiam zinga hlawh hnem ber chu Colombian-American actress, Sofia Vergara a nih thu a puang. Angelina Jolie chu pahnihna a ni a, Gal Gadot chu pathumna a ni bawk. Forbes hian list a tihchhuah thar berah hian nikum June aṭanga kumin June thlenga suma lalut tamte a tarlang a ni.

Sofia Vergara hi mi tam tak chuan tunge a nih kan hre lutuk kher lo mai thei. Khawvel pum deng dawt khawpa film larah channa a nei lo ti ila kan sawi sual tam awm lo e. Chutih rual chuan mi tam tak chuan ABC comedy series Modern Family aṭangin kan hmelhriat a rinawm a, America's Got Talent judge a nih bawk avangin a hmel hi chu kan hre fur mai thei thung.  New Year's Eve (2011) leh  Machete Kills (2013)-ahte a inlan a,  The Smurfs (2011)-ah pawh a inlan bawk. 

Nikum June aṭanga kumin June inkar khan $maktaduai 43 a la lut a, tun dinhmunah chuan khawvel hmeichhe film chan thiam zinga hlawh hnem ber a ni. 

Lemchan thiam chuai hleithei lo, Agenlina Jolie chu pahnihna a ni a, ani hian $mtd 35.5 a lalut a ni. Wonder Woman star Gal Gadot chu hlawh hnem ber pathumna niin, ani hian $mtd 31.5 a hlawh a ni. 

Forbes-in Highest-Paid Actress list kumin atana a tihchhuahah hian beisei loh takin small screen star pathum Sofia Vergara, Ellen Pompeo leh Elisabeth Moss-te an lang a, hei hi top celebrity ho sum lakluh tlakhniam vang a ni.

Covid-19 vangin kumin March thla aṭang khan America rama movie theatre tam ber chu khar a ni a, chumi vang chuan tun thleng pawhin big-budget movie tlangzarh a la tlem hle. Tlangzarh tura tihkhawtlai zingah hian hmeichhiain 'main role' an channa  Black Widow leh Wonder Woman 1984-te pawh a tel. Movie star tam tak hian  box-office-a an film hit dan azirin bonus tam tak an dawng ṭhin a, chumi vang chuan kumdang ang lo takin kuminah hian top celebrity-te sum lakluh a tlahniam ta niin Forbes chuan a tarlang. 

Frobes hian hmeichhe lemchan thiam hlawh hnem zual 10 a tarlang a, heng ho pawisa hlawh belh khawm hi $mtd 254 a ni.