NEXA Aizawlah S-CROSS tlangzarh

NEXA Aizawl, Ṭhuam­puiah nimin khan Sports and Youth Services minister Robert Romawia Royte chuan Maruti Suzuki S-Cross a khuh hawng.

Maruti Suzuki S-Cross hi product review neitu Lalrawngbawla chuan com­pact SUV ni lo, khawvelin SUV a lawm ber category zinga mi a nih thu sawiin, India rama petrol engine hmang refine ber a nih thu a sawi. 

Mi panga chuan theihna niin petrol engine a hmang a, a engine chu 1462 cc niin, Smart Hybrid Delta, Zeta leh Sigma version-te an siam a, a man chu Rs nuai 8.9 vel aṭanga Rs nuai 12 chuang man thlengin a awm a ni.

S-Cross tlangzarhtu Robert Romawia chuan social media-a midang na tak taka diriam chu Mizo ṭhalaite'n an sim a hun tawh tih sawiin kan ṭhenawm state-a cheng Naga, Khasi leh Manipuri te pawhin an ching lo niin a sawi. Thudik tih avanga social media-a post ringawt chu himna a ni lo tih sawiin, thudik avangin jail-ah a tan theih tho thu a sawi bawk.

Sports Minister chuan NEXA CEO John Lalpeka chu Aizawl FC neitu zinga tel ve turin a sawm bawk. Equal share ang emaw, chutiang lo deuh pawh chuan kawng dang a awm thu sawiin, ka sawm ta rup mai a ni, tiin a sawm.    

NEXA hi Maruti premium product a ni a, NEXA Aizawl bik hian tunah hian thla tin motor 70-80 vel an hralh thu Sales Manager Lalrinngheta Renthlei chuan a sawi a, kum khat leh tlem chauh Mizoramah la inbun mah se motor unit 1200 vel an hralh tawh tih a sawi.