The New Mutants No.1 a ni nghal Khawvel pumah Tenet a che ṭha

Box Office chart-in ngai a awh chho mek a, The New Mutants chu beisei lawk ang ngeiin sum a rawn lalut tam ber a, Unhinged chu pahnihna niin Bill & Ted Face the Music chu pathumna a ni bawk.

Zirtawpni liam taa US-a an tlangzarh tak 'The New Mutants' chu rin lawk angin sum lalut tam ber a ni a, theatre 2,412 aṭangin $7,037,017 a lalut a ni. Hripui leng vangin boruak a la mumal lo a, sum a hailuh zat pawh hi a tam nge a tlem tih hriatthiam a har hle a, chutih rual erawh chuan tun ang dinhmuna film lian theatre-a chhuah tura tlangzarh ngam tlemte zinga mi a ni thung a; film siamtute huaisenna erawh a fakawm hle.

'The New Mutants' siamna atana an budget hi $maktaduai 67 lai a ni a, an senso zat hmu chhuak tur chuan an thawhrim a la ngai dawn hle thung. US tih loh ram dangah erawh chuan an la tlangzarh tam lo a, hetichung hian khawvel puma a sum lakluh tawh chu $9,937,017 a tling tawh a ni.

Film critics lamin fak lutuk lo mah se tunlaia film chhuak tharah chuan en tlak ber pawh a ni tih erawh a chiang. 

Boruak ralmuang pangngaiah chuan US-ah khuan theatre 4k chuangah kar tawpah hian movie an tichhuak tlangpui a, mahse hripui a leng miau a, dinhmun a la pangngai thei lo. Chuti chung chuan tunah hian film lian chhuahna tur chuan theatre hawn ṭhin 50% vel chu hawn a ni leh tawh. Tun kar tawp ni lo, kar hmasa tawp lamah kha chuan US pumpuiah theatre sang khat pawh an la hawng lo a, tunah erawh sang hnih chuang an hawng tawh a ni.

The New Mutants hi theatre 2,412-ah an chhuah tawh a, Unhinged pawh theatre 2331 laiah an chhuah tawh bawk. Film industry-in ngai a awh chho ṭan leh mek niin a lang.

The New Mutants bakah hian Top 5-ah hian film thar dang pahnih a la awm. Film thar Bill & Ted Face the Music chu pathumna  a ni a, The Personal History of David Copperfield chu palina a ni bawk. Chart hmasa pathumna Words on Bathroom Walls chuan top 5 hi a khar a ni.

Top 5 chin hi theatre sangkhat aia tamah an chhuah thei tawh a, US-ah chuan film industry dinhmun a ziaawm sawt hle tih a hriat theih.

Christopher Nolan-a film Tenet US-ah tlangzarh la ni lo mah se sum a hailut tam tawh hle a, khawvel hmun hrang hrangah $mtd 53.6 a hailut der tawh.

Inrinni liam ta khan UK-ah tlangzarh a ni a, UK bakah hian khawvel ram 40-ah tlangzarh a ni tawh. UK-ah ringawt hian $mtd 7.1 a lalut. Hri leng vangin khawvel ramdangah pawh theatre khar a la ni ṭhup dawn tih a chiang a, hetiang a ni chunga hetiang zat sum a lalut thei hi miin an nghakhlel tih a hriat.

Zirtawpni lo awm turah hian US-ah an tlangzarh dawn chauh a, hemi hnu hi chuan a sum lakluh tur hi a pun hluai rin a ni.

$mtd 200–225 vel senga an siam Tenet hi critics lamin an fak hle nghe nghe a, director Nolan hi a film siam tawh reng reng sawi hat tham a ni ṭhin a, Tenet a ruahman dan pawh hian fak a hlawhin a changtute pawh an fak hle.

John David Washington, Robert Pattinson, Elizabeth Debicki, Dimple Kapadia, Michael Caine, leh Kenneth Branagh-te channa Tenet hi kumin chhunga film tlangzarh tur zinga boruak nei ngah ber pawl a ni a, film lam tuipuitute pawhin an nghahhleh ber zinga mi a ni.