Box Office: Tenet khum thei an awm lo

US Box Office-ah Tenet bawk­in ro a rel leh a, Hocus Pocus (2020 Re-release) chu pahnihna niin The New Mutants chu pathumna a ni.

Tenet hi tunhnaia big budget movie tlangzarh ngam tlemte zinga mi a ni a, Box Office-ah pawh ro a rel rei tawh hle. Kar tawpah khan theatre 2,722-ah tihchhuah niin $2,700,000 a lalut a, budget lian film dang an tlangzarh hma chuan ro a rel dawn niin a lang.

Film lian tunhnaia tlangzarh tura ruahman tawhte chu nakkum lama tlangzarh tura sawn hlat a awm leh nual tak avangin Tenet hian Box Office-a dinhmun ṭha ber hi a la luah rei deuh mai thei a ni. Chutih rual chuan a sum lakluh a tlakhniam ve zel avangin film thawm nei lian lutuk lo pawhin a rawn nek chhuak ve mai thei bawk.

Tenet hian US-ah $45,100,000 a lalut tawh a, khawvel puma a sum lakluh tawh zat chu $mtd 307 a tling tawh a ni.

Hocus Pocus hi kum 1993-a tlangzarh tawh kha niin Covid-19 vanga film lian tam tak tlangzarh theih a nih tak loh avangin film hlui eng emaw zat chu tlangzar thar leh a ni a, chung zingah chuan Hocus Pocus pawh hi a tel a ni. Kar tawpah khan theatre 2,570 aṭangin $1,925,000 a lalut.

Pathumna chu Massie Williams channa The New Mutants kha a ni a, $1,042,158 a lalut a ni. The New Mutants hian khawvel pumah $41,956,219 a lalut tawh a ni. 

Box Office top 10-ah film thar pahnih Possessor Uncut leh Save Yourselves!-te a lang a, pariatna leh 10-na an ni.

Kar hmasa lama pathumna Unhinged chu palina  a ni a, Infidel chu a dinhmun ngai panganaah a la awm thung.