'Super Mario Bros' sequel chhuah tur tichiang ta

Nintendo game director, Shigeru Miyamoto chuan Super Marios Bros movie hlawhtling tak an siam hnuah, a film pahnihna tur chhuah hun tur a rawn puang leh ta.

'Super Mario Bros' sequel hi April 3, 2026-ah tihchhuah a ni dawn tih Miyamoto chuan social media lamah a rawn sawi a, a plot details hi la awm lo mah se, animated film an siam leh tur hi hmuhnawm leh hlimawm tak a ni dawn tih a sawi nghal bawk. Illumination founder leh CEO, Chris Meledandri leh Miyamoto-te'n an produce dawn a, Matthew Fogel chuan script ziakin, Aaron Horvath leh Michael Jelenic-te'n an direct ang. Kum 2023-a tihchhuah, "The Super Mario Bros. Movie" kha an chet ṭhatpui hle a, hemi kuma film tihchhuah zinga sum la lut hnem ber dawttu a ni pha hial. Actor lar, Christ Pratt chuan he film-ah han Mario aw a thawh a ni.