Princess of Wales-in thlalak edit vangin thupha chawi

Britain princess of Wales, Kate Middleton chuan a fa pathumte nena an thlalak, Pathiannia Kesington Palace-in a tihchhuah a edit avanga mipui lama hriat thiam lohna awm avangin thupha a chawi.

An nufa thlalak hi Pathianni khan 'The Prince and Princess of Wales' social media account-ah Britain-a Mother's Day an hman pualin an post a ni. Mahse thlalak hi an dah chhuah hnuah edit a nih chungchang hi social media lamah an sawi zui nasa hle a, photo distributor ṭhenkhat - Reuters, The Associated Press, Getty leh AFP pawhin a platform aṭangin thlalak hi an la thla zui bawk. Hemi hnu, Thawhṭanni khan Princess of Wales hian an social media account kaltlangin thupha chawina a chhuah a, thla la thiam tak ang a ni ve lo a, midangte ang bawkin an thlalakte chu edit zirna atan a hmang ve ṭhin tih a sawi. An nufa thlalak a edit chungchanga hriatthiam lohna lo awm avang chuan pawi a tih thu sawiin thupha a chawi a ni. Hemi rual hian a damloh chhunga an lo ngaihtuahna avangin lawmthu a sawi bawk. Kate hi January 17 khan abdonimal surgery neiin, hei vang hian in lamah a la inenkawl a, Easter hma chuan mipui hmaah a la inlan thei dawn lo a ni.