Billboard Hot 100-a SKorea act No.1 hmasa ber Bangtang Boys 'Dynamite'

BTS (Bangtan Boys) chuan US Billboard Hot 100 chart-ah history an siam a, South Korean artist zinga Billboard Hot 100 chart No.1 ni thei hmasa ber niin an hla thar 'Dynamite' chu No.1 an nihpui.

'Dynamite' hi kum 62 liam ta chhunga Billboard Hot 100 chart topper 1,109-na a ni chiah. BTS hian March thla khan an hla 'On' chu No.4 an lo thlenpui tawh bawk a ni.

BTS hla thar ber 'Dynamite' hi premiere a nih khan a hit nghal hle a, US-ah ringawt pawh stream maktaduai 33.9 nei nghalin kar khat chhungin download nuai 3 a awm nghal. Nimin thleng khan YouTube-ah maktaduai 267 chuang thlirtu a nei tawh.

An tlangzarh ni khan biggest premiere record an siam nghal a, an premier rual khan mi mtd 3 velin an thlir nghal. Korean group zinga thlirtu maktaduai 10 nei chak ber record an siam a, minute 22 chhungin he record hi 'Dynamite' hmang hian an siam nghal. 

K-Pop megastar - RM, Jin, SUGA, J-Hope, Jimin, V, leh Jungkook-te hla thar 'Dynamite' hian darkar 24 chhung­in thlirtu mtd 101.1 an nei hman a, hei pawh hi YouTube record niin darkar 24 chhunga thlirtu ngah ber an ni.

Spotify leh iTunes lamah thleng pawh record an siam lehzel nen, BTS hi an hit chho malh malh hle a, Pathianni liam taa sem tak MTV Video Music Awards-ah pawh khan award pali lai an hum haw bawk.

Kumin chhung hian album thar tlangzarh an tum bawk a, BTS boruak hian kumin chhung chuan entertainment khawvel chu an al hneh rih dawn hle niin a lang.