Spotify-in music video dah tel ve ta

Digital music service, Spotify chuan audio streaming service chauh an kalpui hnuah music video an dah tel ve ta a, mahse, ram ṭhenkhat thlan bikah chauh dah a ni rih ang.

'Artist-to-fan connection' ṭha zawk siamna turin, Spotify chuan 'Now Playing' screen-ah music video hi dah tel an tum a, button aṭangin a music video en duhte tan 'switch to video' tih siam a ni ang. A kaldan phung hi YouTube Music zulzuia siam a ni.

He feature thar hi Android, iOS leh TV leh desktop-a Spotify apps-ah a awm vek dawn a, user-te chuan audio leh video hi an duh zawk an thlang thei dawn a ni. Mahse tunah rih chuan music video-te hi beta-ah chauh a la awm a; U.K., Germany, Italy, Netherlands, Poland, Sweden, Brazil, Colombia, Philippines, Indonesia leh Kenya-ah chauh hun eng emaw chen hman theiha dah hmasak phawt a ni ang.