Sorkar laipuiin ui breed 23 lak luh a khap

Sorkar laipui chuan India ramah ui breed 23 lak luh a khap a, khap zingah hian Pitbull Terrier leh Rottweiler pawh an tel.

India ram chhungah ui seh leh beih tawk an pung nasa hle a, hei vang hian sorkar chuan ui breed hlauhawm zual 23-te lak luh khapna hi a siam ta a ni. State sorkar tin hnenah pawh hriattirna pe nghalin, ui breed hlauhawm nia a tarlante hi ram pawn lam aṭanga lak luh, hralh leh tihpun khap turin a ti a ni. He khapna hian ui breed a tarlante mixed breed leh crossbreed pawh a huam tel vek a ni.

Union Department of Animal Husbandry and Dairy chuan state sorkar tinte chu ui breed an tarlan bikte zawrh leh breeding atana license/permit engmah pe chhuak lo turin a ti a, hetiang ui lo vulh sa tawhte chu chi thlah puntir tawh lo turin a ti bawk. State sorkarte chu Dog Breeding and Marketing Rules 2017 leh Pet Shop Rules 2018-te kengkawh turin hriattir an ni bawk.

Hemi hma hian Delhi High Court chuan ui breed ṭhenkhat chu vulh a lo khap tawh a, hemi hnu hian court thupek chungchang hi commissioner kaihhruai committee-in a ngaihtuah a, ui breed 23-te lak luh khapna hi an siam a ni. He committee-ah hian expert leh animal welfare group-te an tel.

Sorkarin India rama ui breed lak luh a khapte chu - Pitbull Terrier, Tosa Inu, American Staffordshire Terrier, Fila Brasileiro, Dogo Argentino, American bulldog, Boerboel, Kangal, Central Asian Shepherd Dog, Caucasian Shepherd Dog, South Russian Shepherd, Tornjak, Sarplaninac, Japanese Tosa and Akita, Mastiffs, Rottweiler, Terriers, Rhodesian Ridgeback, Wolf dogs, Canario, Akbash dog, Moscow Guard dog, Cane Corso bakah 'Ban Dog' tia hriat larte an ni.