Film thar 'Tualsumsu' a chhuak dawn hnai

'2Wheeler Taxi Driver' hlawhtling taka siamtu, Zote Entertainment chuan tun thlaah short film thar, 'Tualsumsu' a tichhuak leh dawn.

'Tualsumsu' hi film pangngai ang ni loin, Reality Show anga buatsaih a ni a, a film pumpui hi minute 45 vel awh tur a ni. Vlog anga kalin, camera stop loin (continuous shoot) veka shoot a nih avangin a hautak hle a, a film tidangdaitu a ni nghal bawk. Mizo thlahrang film-ah chuan a danglam hle tura ngaih a ni. He film hi Mike-a direct-na hnuaiah buatsaih leh a ni a, ani hian film siam lamah sulhnu ṭha tak tak a nei tawh a ni. Story pawh ama kutchhuak tho a ni ang. A changtu zingah mithar leh thar lo an inpawlh deuh nuk a, 'Thaibawih' film tihmuhnawmtu Mesty Tochhawng, 'Duhaisam'-a kan hmuh Hmingsangzuali bakah a ṭum khatna atan Remremi te an inlan dawn. Mipa lamah 'Ka U Liana' film-a mi, Lalruatmawia, '2Wheeler Taxi Driver'-a Lucas Tlau an chang bawk. 'Nutei Thingpui Dawr' Raven pawh kan hmu dawn a ni.