Oscar dawngtute tan dan khauh tak zam

Movie industry lamah Oscar awards hi chawimawina ngaihhlut ber zinga mi niin, a dawng pha nih pawh inchhuanna tham a ni. Hemi rual hian Oscar dawngtute tan hian Academy Awards chuan dan khauh tak a zamsak a ni.

Academy Awards 'regulations' section chuan Oscar winner-te chu midang hnenah trophy hralh chhawn a khapsak. Oscar statue hi an ngaihlut, dawng phak nih pawh an chak em em laia hetianga dan siam a ngai hi thil mak tak niin a lang.

Academy chuan an dan siamah, 'Award winner tu pawh, a Oscar statuette hralh emaw tihral emaw phalsak an ni lo. Tihral ngei a duh a nih pawhin, Academy hnenah USD 1-in a zawrh hmasa phawt tur a ni,' a ti. Statue hi gold plated ni mah se, winner hian a tiral duh a nih pawhin Academy hnenah hian USD 1 chauhin a hralh a ngai dawn a ni. He khapna hian award dawngtu bakah, a rochuntute thlengin a huam tih a tarlang bawk.

He dan hi kum 1951 aṭanga hman ṭan a ni a, khing let pawh an lo awm tawh a, mahse, tun thlengin an la khing hneh lo.

Kum 2014 khan Joseph Tutalo chuan a pu, Joseph Wright-a'n kum 1943-a award a lo dawn chu lilamin, USD 79,200 in a hralh a, mahse, Academy hian Tutalo leh he award lilamtu, auction house chu contract bawhchhiaah puhin a khing zui a ni. California judge chuan Academy hi thiam chantirin, award lilam lo chhangtu pawh hian a statue lei chu a pe kir leh a ni.

Kumina Oscar Awards neih zawh tak kha kum li chhunga thlirtu an tam ber ṭum niin, mi maktaduai 19.5-in an thlir. Show neih chhunga thlirtu an tam ber lai chu Ryan Gosling-a'n 'I'm Just Ken' tih a perform lai leh, Cillian Murphy-a'n best actor award a dawn kha a ni. Kum tam tak chhung chu US-ah Academy Awards hi Super Bowl dawta TV programme thlir nasat ber a ni reng ṭhin a, Nielsen records-a a lan danin, kum 2018 hma lam khan thlirtu hi mtd 30 hnuai lam a ni ngai lo. Thlirtu tam ber record chu 'Titanic' chet ṭhat kum, kum 1998 kha niin, thlirtu mtd 55 an tling.