Khiangte Construction Ṭhazual : GOSPEL Pakhatna hauhtu Zorinsanga Sailo 'Sam 23'

Khiangte Construction Ṭhazual Gospel-ah Zorinsanga Sailo chuan 'Sam 23' tih chu pakhatna a nihpui.

'Sam 23' hi Mizoram Synod hnuaia family guidance & counselling centre-in Kristian chhungkaw short film insiamsiak a buatsaih ṭuma Ramhlun North Presbyterian short film OST a ni. Hla phuahtu hi Chris MS Dawngkima niin, music hi Lal K Sailo kutchhuak a ni a, recording leh mastering hi Kings & Prophet-ah an ti a ni. Videographer-te hi Tea Chhakchhuak, Merky Khawngaiha leh V.L.Thuneia te an ni. A hla a ṭhain a nalh a, a satuin a thiamin a sa nung bawk si, thlir leh ngaihthlak a manhla hle. Zorina hi Praise on 2016-ah khan pahnihna a ni a, a zaithiamzia leh aw ṭhatzia pawh kan hria a, hla thar dang pawh a rawn neih chhoh zel beisei ang.

Lalfakawmi 'Davida lam' chu chart hmasaa no. 5 aṭangin no. 2-ah a rawn chho a, he hla ropui leh danglam tak hi a rawn sa chhuak mawi vawng vawng hle. No. 3-ah Esther Khiangte 'Kir an rel lo' tih awmin, ani pawh hian hma a rawn sawn zel. Lalhmudiki 'Ka vui love' tih chu no. 4-ah rawn chho bawkin, Priscilla Laldinpuii Fanai 'Min hmangaihna ropui' chuan Top 5 a rawn khar.

Ṭhazual Gospel chart tharah hian a hmaa lo lang tawh, Sanga Renthlei leh Mawimawii te kan la hmu chhunzawm a, hetih lai hian rawn lang thar pathum Nghaktea Fanai, One in Christ leh Lalthansangi te an awm bawk.