Movie Franchise zingah MCU-in sum a la lut hnem ber

Box office lamah movie hlawhtling deuhte chu a chhunzawmna siam an ni fo a, ṭhenkhat an tihfuh viau laiin, chet fuh chhunzawmpui lo pawh an awm ve bawk. Film a hit a, sum a lak luh ṭhat chuan a chhunzawmna a awm leh ngei tura rinna a awm nghal tawh a, hemi rual hian mipui lam aṭanga siam chhunzawm tura nawrna pawh a awm ve bawk.

Hollywood movie franchise zingah Marvel Cinematic Universe (MCU) chu sum la lut tam ber a ni. MCU hian movie 33 aṭangin USD tld 29 a la lut pha. Hun eng emaw chen an sum lak luh a tlakhniam hnuah, major comeback neih tumin an inbuatsaih leh mek a, installment pakua siam tur an ruahman leh der tawh. An film siam hmasa ber chu 'Iron Man' niin, tihchhuah hnuhnung ber chu 'The Marvels' a ni. An character-te hi - Iron Man, Captain America , The Hulk , Ms. Marvel , Hawkeye , Black Widow , Thor , Loki , Captain Marvel , Falcon, Black Panther, Monica Rambeau leh Scarlet Witch te an ni.

Movie franchise zinga sum la lut tam ber dawttu chu Star Wars a ni. Film 12 aṭangin USD tld 10.33 an la lut a, an movie hmasa ber 'Star Wars : A New Hope; khan USD mtd 775 a la lut thei. An character-te hi Luke Skywalker , Han Solo , Princess Leia Organa , Din Djarin , Yoda , Grogu, Darth Vader , Emperor Palpatine leh Rey Skywalker te niin, film an tihchhuah hnuhnung ber chu Star 'Wars: Episode XI - The Rise of Skywalker' a ni.

Pathumnaah Harry Potter franchise awmin, film 11 aṭangin USD tld 9.57 a la lut. A film hmasa ber chu 'Harry Potter and the Sorcerer's Stone' tih a ni a, a hnuhnung ber chu 'Harry Potter And The Deathly Hallows Part 2' a ni. A film hnuhnung ber hian box office-ah USD tld 1.32 a a lut pha.